ރޯދަ ހިފުމުގެ ފައިދާ

ރޯދަ ހިފުމަކީ އޭގެއިން ހަށިގަނޑަށް ވަރަށް ގިނަ ފައިދާތަކެއް ލިއްބައިދޭ އެއްޗެކެވެ. ޚާއްޞަކޮށް 12 ގަޑިއިރުން ފެށިގެން 72 ގަޑިއިރަށް ދެމިގެންދާގޮތަށް ރޯދަ ހިފައިފިނަމަ ލިބިދޭ ސިއްޙީފައިދާތަށް އެއީ ޙައިރާންކުރުވާހައި ބޮޑެތި ފައިދާތަކެވެ. އިރުއިރުކޮޅާ ކޮންމެވެސް އެއްޗެއް ކައިބޮއި ހަދާނަމަ މިފައިދާތަކުން މަޙުރޫމް ވާނެއެވެ.

އެގޮތުން ދިގުދެމިގެންދާ ގޮތަށް ރޯދައަށް ހުރުމުން ހަށިގަނޑު  ސަވައިވަލް މޯޑް (ގުނަވަންތައް އަރާމުކުރާ ޙާލަތު) އަށް ދެއެވެ. އަދި މިއީ ހަށިގަނޑަށް ބޭނުންވާ މުޙިއްމު މަރާމާތުތައް ކުރުމަށް ލިބިގެންދާ ފުރުޞަތެކެވެ.

ކުއްލިއަކަށް ދިގުދެމިގެންދާގޮތަށް ރޯދަހިފުމަކީ ބުއްދިވެރިގޮތެއް ނޫނެވެ. ހަށިގަނޑު މަޑުމަޑުން ހާނަމުން ގޮސް ހަށިގަނޑަށް އެކަން ކުރެވޭވަރަށް ހޭނުމުން ދިގު ރޯދައެއް ހިފުމަށް ފަސޭހަވާނެއެވެ. ވަރަށް ބޮޑަށް ބަނޑުހައި ނުވާނަމަ ނުކާށެވެ. ކުޑަކޮށް ބަނޑުހައިވިޔަސް ވަރުބަލިކަމާއި ލޮޑުކަން އިތުރުނުވާކަމުގައި ވަނީނަމަ ކެތް ކޮށްލާށެވެ. އޭރުން އޭގެ ފައިދާ ލިބޭނެއެވެ. އަދި ދިގުދެމިގެންދާ ގޮތަށް ރޯދަ ހިފާއިރު އިލެކްޓްރޯލައިޓްސްއާއި ވިޓަމިންއާއި މިނަރަލް ބޭނުންކުރުމަކީ ވަރަށް މުޙިއްމު ކަމެކެވެ. ޕިންކް ހިމާލަޔަން ސީސަލްޓް ވަރަށް ރަނގަޅު ވާނެއެވެ.

ރޯދަ ހިފަމުން ގޮސް 12 ގަޑިއިރު ހަމަވާއިރަށް ގުރޯތު ހޯމޯން އެކްޓިވޭޓް ވެއެވެ. މިއީ މުސްކުޅިވުން ލަސްކޮށްދޭ ހޯމޯން އެކެވެ. އަދި ސަރުބީ އަންދައިދޭ މައި ހޯމޯން އަކީވެސް މިއެވެ. މިހޯމޯންއަކީ ހުޅުތައް ފަސޭހަކުރުމުގެ މަސައްކަތްވެސް ކޮށްދޭ ހޯމޯން އެކެވެ. އަދި އެކި ކަހަލަ ޕުރޮޓީން އުފެއްދުމުގައިވެސް އެހީވެދެއެވެ.

18 ގަޑިއިރު ހަމަވުމުން އޮޓޯފެޖީ (ހަލާކުވެފައި ހުރިތަކެތި ރިސައިކަލް ކުރާ ސިސްޓަމް) މަސައްކަތް ކުރަން ފަށައެވެ. މި މަސައްކަތް ފެށުމުން ހަށިގަނޑުގެ އެކި ތަންތާނގަ ހަލާކުވެފައާއި ބޭނުންނުކުރެވޭ ހާލަތުގައި ހުރި އެކި ކަހަލަ ޕުރޮޓީންތައް ރިސައިކަލް ކޮށް އޭގެން ހަށިގަނޑަށް ބޭނުންވާ ޕުރޮޓީންތައް އުފައްދައި އޭގެއިން އައު ޓިޝޫ އުފައްދައެވެ. ހަށިގަނޑު ކުނިތަކުން ސާފުކޮށްލައެވެ. އަދި މައިކްރޯބް ތަކާއި، ފަންގަސްތަކާއި، މޯލްޑްތަކާއި ޔީސްޓްތައް ސާފުކޮށްލައެވެ. ނަތީޖާއަކީ ހަށިގަނޑު ޒުވާންކޮށްދީ ހަމުގައި ޖެހިފައި ހުރި ރޫތަކާއި މުސްކުޅިވާކަމުގެ ޢަލާމާތްތައް ފަސޭހަކޮށްދިނުމެވެ.

24 ގަޑިއިރު ހަމަވާއިރު ލިވާ (ފުރަމޭގައި) ހުރި ގުލައިކޮޖެންގެ ރިޒާވް ހުސްވާން ފަށައެވެ. އަދި ހަށިގަނޑުގައި މައިގަނޑު ހަކަތައިގެ ގޮތުގައި ކީޓޯންސް ބޭނުންކުރެއެވެ. ކީޓޯންސް ބޭނުންކުރުމުން ބަނޑުހައިކަން ފިލައިދެއެވެ. ހަށިގަނޑުގެ ހަކަތަ އިތުރުވެއެވެ. ހަށިގަނޑުގެ އެންޓި އޮކްސިޑަންޓް ރިޒާވް މައްޗަށްދެއެވެ. ނަތީޖާއަކީ ހަށިގަނޑުގައި އޮކްސިޑޭޝަން އުފައްދާ އެއްޗިހި މަދުވެގެން ދިއުމެވެ. ތައިރޮއިޑް ހުންނަ މީހުންގެ ތައިރޮއިޑް މައްސަލަތައް ހައްލުވާން ފަށައެވެ. ހަށިގަނޑުގެ އެތެރޭގައި އުފެދިފައި ހުރި އިންފުލެމޭޝަން (ދުޅަވެ ތަދުވާ ތަންތަން) ފަސޭހަ ކޮށްދީ ދުޅަ މަދު ކޮށްދެއެވެ. ބަނޑުގެ ސަރަޙައްދުގެ މައްސަލަތައް ޙައްލުވެ ފަސޭހަވާން ފަށައެވެ. ސީބޯ (ބޮޑު ގޮހޮރުގައި އުޅެންޖެހޭ ބެކްޓްރިއާ ޖަރާސީމު ކުޑަގޮހޮރުގައި އުޅުން) ގެ މައްސަލަ ރަނގަޅުވާން ފަށައެވެ. ހަށިގަނޑުގައި ސްޓެމް ސެލް އުފައްދާ މިންވަރު އިތުރުކޮށްދެއެވެ. ހިތުގެ މައްސަލަތައް ޙައްލުވާން ފަށައެވެ. އަދި ސިކުނޑީގެ މަސައްކަތްތައް ރަނގަޅުވާން ފަށައެވެ. ސިކުނޑީގެ އައު ސެލްތައް އުފައްދައެވެ. މިއުފައްދާ އައު ސެލްތަކުގެ ސަބުން ހަނދާން ގަދަވެއެވެ.

އޮޓޯފެޖީގެ ސަބަބުން މަސައްކަތް ނުކުރާ ޕުރޮޓީންތައް ބޭނުން ހިފޭ ޕުރޮޓީންއަށް ބަދަލު ވުމުން ހަށިގަނޑުގެ މަސައްކަތްތަކަށް ބޭނުންވާ ކާނާ މަދުވެގެންދެއެވެ.

48 ގަޑިއިރު ހަމަވުމުން ހަށިގަނޑުގައި ސްޓެމް ސެލް އުފައްދާ މިންވަރު އިތުރުކޮށްދެއެވެ. ސްޓެމް ސެލް އަކީ އެސެލްއާއި ވަކި މަސައްކަތެއް ޙަވާލުކުރެވިފައި ނުވާ ސެލްއެވެ. ބޭނުންޖެހުމުން ކޮންމެ ތަނަކަށްވެސް ބޭނުންކުރެވޭ ފަދަ ސެލް އެކެވެ. މީހާ މުސްކުޅި ވާވަރަކަށާއި، ހަކުރު ގިނައިން ބޭނުންކުރުމުންނާއި، އިރު އިރުކޮޅާ ކެއުމުން ހަށިގަނޑުގައި ސްޓެމް ސެލް އުފެއްދުން މަދުވަމުން ދެއެވެ. ހަށިގަނޑުގައި ޖަހާފައި ހުންނަ ޓިއުމަރު (ސިސްޓު، ފައިބްރޮއިޑް) ތައް ކުޑަކޮށްދީ  ފަސޭހަކޮށްދެއެވެ. އަދި އެކި ކަހަލަ ކެންސަރުތަކުގެ ރިސްކު ކުޑަވެގެންދެއެވެ. ދިގު ދެމިގެންދާ ހެން ރޯދަ ހިފާއިރު ހަށިގަނޑުގައި ބޭނުންކުރާ ހަކަތައަކީ ކީޓޯންސް އެވެ. މިއީ ޓިއުމަރު ތަކަށް ބޭނުން ހިފޭ ހަކަތައެއް ނޫންކަމުން އެތަކެތީގެ ބާރު ދެރަވެ ބަލިކަށިވެގެން ދެއެވެ. ޓިއުމަރުގެ ކާނާ އަކީ ހަކުރެވެ. ހަކުރު ނުލިބުމުން އެތަކެތި ބަލިކަށިވެއެވެ. އެހެންކަމުން ޓިއުމަރުތައް ބަނޑަށް ޖެހެއެވެ. މައިޓޯކޮންޑްރިއާ (ސެލްތަކުގެ ހަކަތަ އުފައްދާ ޖަނަރޭޓަރ) އިތުރު ކޮށްދެއެވެ. އެހެންކަމުން ހަށިގަނޑުގެ ހަކަތަ އިތުރުވެ ވަރުބަލިވުން ކުޑަވެއެވެ.

72 ގަޑިއިރު ވާއިރަށް ހަށިގަނޑުގައި ސްޓެމް ސެލް އުފެއްދުން ވަރަށް ބޮޑުތަން އިތުރުވެއެވެ. ހަށިގަނޑުގެ ދިފާޢީބާރު ވަރުގަދަވެގެންދެއެވެ. ހަށިގަނޑުގެ ސެލްތައް އެކިކަހަލަ ސްޓްރެސް ތަކުން އަރައިގަތުމުގެ ޤާބިލުކަން އިތުރުވެގެންދެއެވެ.

ދިގު ދެމިގެންދާ ގޮތަށް ރޯދަ ހިފާ ނިމުމުން ކެއުމަށް ފަށާއިރު މަޑުމަޑުން މަދު މިންވަރެއް ކެއުން ބުއްދިވެރިއެވެ. ކުއްލިއަކަށް ބޮޑު ކޭމެއް ކައި ނިންމާލުމުން ހަށިގަނޑަށް ޝޮކެއް ލިބިގެންދާނެއެވެ. އަދި އެހިފި ރޯދައިގެ ފައިދާތަކުން ބައެއް އުނިވުމަކީ އެކަށީގެންވާ ކަމެކެވެ.

މީގެ އިތުރުންވެސް ރޯދަހިފުމުން ލިބޭ ފައިދާތައް ހުރެއެވެ. ސިއްޙަތު ރަނގަޅު ގޮތުގައި ބެހެއްޓުމަށް އެދޭ މީހާ މިފައިދާތައް ހޯދުމަށް އަވަސްވެގަތުން ބުއްދިވެރިއެވެ. ބަރުދަން ލުއި ކުރުމަށް އިންޓަމިޓެންޓް ފާސްޓިންގ އާއި ކީޓޯ ޑައެޓް ގެ ބޭނުން ހިފާށެވެ.

1 | 41